Сенат Польшчы прыняў законапраект пра абмежаванне права на прытулак. Раней яго зацвердзіў Сейм. У верхняй палаце польскага парламента за закон прагаласавалі 72 сенатары, супраць выступілі 10. Сенат таксама не ўнёс паправак у законапраект, піша Reform.news.
Праект прадугледжвае, што польскі ўрад на прадстаўленне Міністэрства ўнутраных справаў і адміністрацыі зможа ўводзіць часовае абмежаванне права на падачу хадайніцтва пра міжнародную абарону. Такое абмежаванне будзе ўводзіцца на тэрмін да 60 дзён на пэўным участку мяжы. Падоўжыць тэрмін дзеяння абмежавання можна будзе на 60 дзён са згоды Сейма.
На іншых вонкавых межах, не ахопленых пастановай, будуць дзейнічаць агульныя правілы. З часовага абмежавання падачы заяваў на міжнародную абарону будуць выключаныя ўразлівыя групы. Да іх, у прыватнасці, адносяцца цяжарныя жанчыны, няпоўнагадовыя без апекі і асобы, якія маюць патрэбу ў асаблівым абыходжанні.
Папраўка таксама прадугледжвае ўвядзенне дадатковых падставаў для пазбаўлення статусу бежанца. Да іх адносяцца асобы, якія ўяўляюць пагрозу дзяржаўнай бяспецы, а таксама замежнікі, што маюць прысуд за здзяйсненне асабліва цяжкага злачынства, які ўступіў у сілу.