«Пахаванне» «Зялёнай карты», відаць, адмяняецца: па гэтай страхоўцы ўвялі чарговыя змены. Да чаго рыхтавацца кіроўцам

29 чэрвеня 2023 у 1688047980
«Зеркало»

Па «Зялёнай карце» ўвялі чарговыя змены. Як паведамляе Беларускае бюро па транспартным страхаванні, гэты поліс будзе дзейнічаць паміж Беларуссю і Расіяй і пасля 30 чэрвеня, кіроўцы змогуць і далей афармляць такія страхоўкі. Нагадаем, раней страхавальнікі анансавалі, што з канца гэтага месяца афармленне «Зялёнай карты» будзе немагчымае ні ў адну з краін.

У бюро тлумачаць, што беларускія страхавальнікі з 30 чэрвеня змогуць па-ранейшаму заключаць дамовы страхавання «Зялёная карта» з тэрыторыяй дзеяння выключна ў Расіі.

«Гэтыя дамовы страхавання "Зялёная карта" будуць прызнавацца сапраўднымі на тэрыторыі Расійскай Федэрацыі з гарантыямі па іх цягам пазначанага ў іх тэрміну дзеяння, - удакладняюць у бюро. - У аналагічным парадку будзе дзейнічаць і расійскі бок». То-бок расійскія страхавальнікі змогуць па-ранейшаму афармляць такія полісы для паездак у Беларусь.

У бюро адзначаюць, што выплаты па страхавых выпадках будуць ажыццяўляцца «ў парадку, аналагічным устаноўленаму ўнутранымі палажэннямі сістэмы «Зялёная карта».

У «Белдзяржстраху» тым часам паведамляюць, што паміж Беларускім бюро па транспартным страхаванні і Расійскім саюзам аўтастрахавальнікаў падпісанае пагадненне, «якое забяспечвае бесперапыннасць узаемнага транспамежнага страхавання транспартных сродкаў абедзвюх краін».

Пры гэтым «Зялёную карту» для паездак у Азербайджан і Турцыю, як і анансавалі раней, можна зрабіць да 29 чэрвеня ўключна. Калі паспець аформіць гадавы поліс, то па ім можна будзе ездзіць у гэтыя краіны да 28 чэрвеня 2024 года. Раней анансавалася, што па такой самай схеме беларускія кіроўцы змогуць ездзіць і ў Расію.

Раней у Беларускім бюро па транспартным страхаванні заяўлялі, што пасля 30 чэрвеня Расія і Беларусь збіраюцца запусціць новую дамову - аналаг «Зялёнай карты», краіны заключылі наконт гэтага пагадненне. Але для гэтага ў Беларусі мусяць спачатку ўзгадніць і падпісаць указ. У бюро спадзяюцца, што да 1 ліпеня «нешта будзе». Калі не - тады на ўездзе ў РФ беларусам трэба будзе купіць дамову ОСАГО (гэта можна зрабіць загадзя анлайн), а расіянам на ўездзе ў нашую краіну - беларускі страхавы поліс.

Расійскі саюз аўтастрахавальнікаў паведамляў, што аналаг страхоўкі можа называцца «Сіняя карта». Таксама ў гэтай арганізацыі адзначалі, што з 1 ліпеня паміж РФ і Беларуссю транспамежнае страхаванне транспарту абедзвюх краін будзе афармляцца на бланках «Зялёная карта» і ўзаемна ўлічвацца да запуску «Сіняй карты» - новай сістэмы міжнароднага аўтастрахавання «з дружалюбнымі краінамі». Запусціць новую страхоўку плануецца з 1 студзеня 2024 года.